थप लोकप्रिय भनाइ तथा कविताहरू

परिपक्व छोरी हुन नपाउँदै मेरी आमा, एउटा घरकी बुहारी हुनुभयो र त्यो घरलाई चम्काउनुभयो । मस्त जवानी हुन नपाउँदै मेरी आमा, मेरा बा' की स्वास्नी हुनुभयो र मलाई जन्माउनुभयो । भर्खरै तरुनी हुन नपाउँदै मेरी आमा, मेरा बा' की श्रीमती हुनुभयो र मेरी आमा हुनुभयो । म जन्मिएँ मेरी आमाले अस्पताल देख्नुभएन म जन्मिदा मेरी आमालाई अरु कसैले देखेन मलाई हातैले टिपी बर्कीले बेह्रेर घाँसको भारीसँगै मेरी आमाले घरमा बिसाउनुभयो । सुत्केरीलाई छुनुहुदैन भन्दै मेरी हजुरआमाले चिसो कुनामा बस्न भन्नुभयो । सुत्केरीले धेरै खानुहुन्न भन्दै आधा बटुको ज्वानाको झोल दिनुभयो । मेरी आमाले ठसठसी कन्दै नानीले फोहोर पारेका थाङ्ना धुनुभयो । कहिले घाँसको भारीमाथी राखेर कहिले आफ्नो अगाडि कोक्रो झुन्ड्याएर मलाई जङ्गल घुमाउनुभयो, भिर देखाउनुभयो । दिनैभरी अर्काको मेलामा गएर खाजामा दिएको एकमुठी मकै जम्मा गरी मलाई सातु बनाइदिनुभयो । मैले सातु खाँदै तपाईं पनि खानु न भन्दा उतै खाएर आएकी समेत भन्न भ्याउनु भयो । मेरी आमा तरुनी हुन नपाउँदै मेरा बा' की श्रीमती हुनुभयो र मेरी आमा हुनुभयो । म सानो छउन्जेल त आमाले कोक्रामा झुन्ड्याउनुभयो बोक्नुभयो, खेलाउनुभयो, खुवाउनुभयो म सानो भइन्जेल खासै डर लागेन अरे । भन्नुहुन्छ अचेल, बाबू!! म न तँलाई बोक्न सक्छु न केही खेलाउन नै सक्छु मायाले एकदुई गाँस बरु खुवाउन त सकूँला, देख्नेहरुले नाटक पारी भन्छन् । त्यसैले, मलाई अचेल खुब डर लाग्न थालेको छ । कतै मेरो छोरो बिग्रेने पो हो कि? कतै मेरो सन्तान कुटिने पो हो कि? कतै मेरो सन्तानले बाटो बिराउने पो हो कि? बिहान ब्युँझिएदेखि राती ननिदाएसम्म यिनै कुरा मनमा खेलिरहन्छन् । भन्नुहुन्छ, बाबू! तेरो रक्षक म बन्न सक्दिन आफ्नो रक्षा अब आफैँ गर्नु । मेरी आमा, तरुनी हुन नपाउँदै मेरा बा' कि श्रीमती हुनुभयो र मेरी आमा हुनुभयो ।